Mat 11 | GAM | STEP | Jisas kogoye una 12-pela moi al kandja dje awo kere, er Galili dumo kerker pakna yei al po kandja dje awo, kandja beke awo moi.

Matthew 11

Jon kogoye una dje wori er Jisas moi al pi

(Luk 7.18-35)

1 Jisas kogoye una 12-pela moi al kandja dje awo kere, er Galili dumo kerker pakna yei al po kandja dje awo, kandja beke awo moi.

2 Jon kaye pa moi al una po embe dji, Krais kogo embe yendo we djimaka une pi. Jon yene kogoye una dje woro embe dji, ye Jisas moya al po embe djine, 3 God, Iwa ta dje worno we dji ge ni wale won mo, una gun ta wonda dje tau mopon ne? dji.

4 Djika kambono Jisas moi al po djimaka, Jisas embe dji, ye wal pille kane yenj mal er yem po Jon moro al dje aume! dji. 5 Una nalene emill yei ge alla kaninj. Una kakene ke yei moi ge alla kamblo er pinj. Una kenj toi moi ge kiwa mor. Una kamallne dall toi moi ge kandja pir. Una gor ge alla agle er wo gun pinj. Una wal kane nanonj ge God kandjiye wopake paro mal pille mor we dji. 6 Na embe yendo ge iwa ta kane nomane soka napai dal, wopake moya we dji.

7 Djika Jon kogoye una er yem pumaka, Jisas una merke moi al Jon pille embe dji, ye asa dumo wapra yei al pi ge, wal nara wal kanbon dje pi? Ye golo ngab kopo wo amblo olup yendo ge kanbon dje pi mo? 8 Ye wal nara wal kanbon dje pi? Ye una konkunom wopake yenj ge kanbon dje pi mo? Ge man. Una embe mal mor ge una king numbne al mor. 9 Ye wal nara wal kanbon dje pi? Ye una propet ta kanbon dje pi mo? Ge wale. Na kandja dje ye aundo, una propet porapora mor ge Jon kamblo aundo. 10 Asa Baibel pepa bolo pagi mal ge Jon pille boi. Pepa bolo embe dji, ni pille! Na iwa ta dje wornaka, une ni er wekle po na kandjina dje orko woro, ni womben al une kondwe amblokun ye moya we dji. 11 Na kandja kaima dje ye aundo, makimb una mor ge Jon porapora kamblo aundo, une kandjiye kerman paro. Ba, God dumoye wopake yero al una kandjine kembis paro una ge, kambono Jon kamblo awinj.

12 Jon kandja dje kogo ye molo pi, ipon mormon ge, God dumoye wopake yero ge una kunda kake, to imbon we djinj. 13 Una lo bolo paglmaka, propet pepa bolo pagi mal kermaka are Jon woi. 14 Asa propet ye molo iwa Ilaija goi alla wonda we dje pepa bolo pagi ge, ye pora we djineke ge Jon pille boi. 15 Ye kamallne paro una, kandja ge pillme! dji.

16 Una ipon mor ge namba mal mor? Na kandja buko namba mal djino? Ga embe mal mor. Una makai to moi al womba bill soka to moi. Bill ta ye molo embe dji, 17 ye gollang djime dji. Ye dji mal no pupnume topin ba, ye gollang ta dje yem nawori. No kimb gollang ta yepin, ba ye kimb ta nayei we dji. 18 Yei mal ge, Jon wo nu pagle awo, kwa nano, nu wain nano yeika, ye une kandjiye amblo, une kum ke tukiye al moro we dji. 19 Alla Una Wombe wo kwa no, nu wain no yeika, ye une kandjiye amblo embe dji, une kwa merke no, nu wain merke no, una ku takis inj una ne, ke yenj una boll aike nondo we dji. Ba God Murble djindo mal pille yene una moye ge, singare pai mal yene dje una embe kanne we dji.

Una nomane ake natoi dal, wandill mal moye

(Luk 10.13-15)

20 Kune ge Jisas dumo pende yei al wane kogo dongall merke yei ba, una kane nomane ake natoi. Une kandja awo embe dji, 21 ye dumo Korasin una ge, urup ye boll wonda! Ye dumo Betsainda una ge, urup ye boll wonda! Na ye boll aike molo, kogo dongall yell ye kani ba, kamasa dumo Taia ne, Saidon una ye wal kani mal kanmaka, kambono wandill kerman golo, toll mon to, nomane ake tomaka. 22 Na kandja dje ye aundo, God una kot yenda kune, God dumo Taia ne Saidon una kot ye aunda ba, dumo Korasin ne Betsainda una mor ge une kot kerman ye aunda we dji. 23 Na kogo dongall dumo Sondom una moi al yellka, God dumo Sondom to djerpall nayeika. Embe yei ge ye dumo Kaperneam una ge God ye kandjine amblo pla kupill al worda mo? Ge man, une ye kandjine kamblo kal woro una gor mor al worda moye we dji. 24 Na kandja dje ye aundo, God una kot ye aunda kune, une dumo Sondom una kot ye aunda ba ye kot kerman ye aunda we dji.

Jisas embe dji, una imb kakinj ge na moro al wome! dji.

25 Kune ge Jisas embe dji, Nena Kerman ni kupill makimb kantau yenden ge, na ni wopake we dje aundo. Una womba kembis mal embe mor ge ni wal paro ge ombine dje awin. Ba alla una kerman kambono ne, nomane kerman pai una nalene amblo au dje nawin. Yen ge Na ni wopake we dje aundo we dji. 26 Nena, ni wopake kaima yen! Ni nomanin pai mal pille yen we dji. 27 Na wal porapora moro ge Nena i na awi. God wariye una kaima nakaninj ba, Ne kando. Ne ge una kaima nakaninj ba wariye kando. Alla wariye ombine dje aunda una ge, Ne para kanne we dji. 28 Ye kogo sipje ye, imb kake mor una ge, ye er na moro al wome! dji. Na ye wopake ye aunaka ye waka moye we dji. 29 Una iko plang i kog kau pedange al woro kogo ye awinj mal, na iko plangna yero ge ye i ye pedangne al embe worne. Na ye iko plang aundo ge kogo kunab paro. Ye kakneke u djinda moye. Na kiye dje molo, na kandjina amblo kal wordo mal ge, ye kane i ye nomane al worne. Worne ge, ye nomane al imb kake moye ge u djinda ye kiwa moye we dji.